2016 traerá seis novas canles á grella da TDT
venres, 8 de xaneiro do 2016
Co inicio de
2016 imos ter novas canles na grella da TDT. Máis
polo miúdo antes de que chegue abril deberán ficar operativas media
ducia de novas licenzas de televisión dixital. Destas seis
canles, xa comezaron a emitir algunhas de xeito íntegro (Atreseries,
que encetou a súa andaina o 22 de decembro, achegando series
españolas e internacionais) ou parcial (10 e 9Kiss TV, que lanzaron
cadanseus vídeos de promoción). Ademais, o servizo Netflix, do
cuxo lanzamento global falamos estes días en Código Cero,
irrompe con forza na televisión de pago, tal
e como fixemos saber en outubro salientando
o seu interesante prezo de partida (de 7,99 euros ao mes para arriba)
e as comodidades multiplataforma que pon en xogo (Smart
TV, PlayStation, Xbox, Chromecast, Apple TV, reprodutores Blu-ray,
iPhone, iPad, dispositivos con Android, móbiles con Windows Phone e
ordenadores persoais).
Como dixemos, entre as novidades deste ano en
materia de TDT atópanse, amais de Atreseries, dúas achegas que xa
comezaron a súa andaina promocional. Trátase por unha banda de
9KissTV, que vén da man de Kiss Media e que fornecerá contidos para
“un público feminino mozo” e, por outra banda, de 10, unha cadea
posta polo Grupo Secuoya e que terá unha vertente claramente
familiar achegando contidos de lecer e ficción. Ámbalas cadeas
emiten xa en probas. A estas novidades cómpre sumar 13TV, Real
Madrid TV, unha canle a maiores adxudicada a Mediaset e, xa no ámbito
da televisión de pago, España Netflix e unha nova achega de
Movistar+ que se coñece como #0 e que se encamiña a captar sobre
todo público novo.