17 empresas galegas beneficiaranse das axudas de Red.es para dixitalizárense

xoves, 6 de xuño do 2019 Redacción

Red.es, a entidade pública empresarial dependente do Ministerio de Economía, vén de resolver a convocatoria de axudas do programa Asesores Dixitais, que pon en xogo máis de 1.200.000 euros para impulsar a transformación das PEME. Ao abeiro desta iniciativa vanse ver beneficiadas 267 pequenas e medianas empresas, recibindo apoio económico de até 5.000 euros para a contratación de servizos de asesoramento TIC na súa actividade. Das 267 empresas participantes, 17 son galegas.
O devandito servizo de asesoramento consistirá nunha cobertura personalizada sobre todos os detalles relativos á transformación: dende a xestión até a relación con terceiros, pasando polo comercio electrónico e a dixitalización de servizos e solucións. O asesoramento incluirá tanto unha análise da PEME, como un plan de acción.
En palabras do director xeral de Red.es, David Cierco Jiménez de Parga, “esta iniciativa servirá para que as PEME españolas melloren a súa competitividade”, engadindo que “o apoio ás empresas, a súa sensibilización á hora de emprender o camiño dixital ou de avanzar nel, resultarán claves para a mellora da economía do país".
Red.es achegará 1.258.750 euros dos 1.668.750 euros do importe global da prestación dos servizos. Isto supón até un 80% do custo dos servizos de asesoramento especializado en materia de transformación dixital por empresa, cun máximo de 5.000 de euros por solicitante. Cada empresa beneficiaria da axuda, pola súa banda, co-financiará como mínimo o 20% restante.

PUBLICIDADE