A UDC consegue unha cátedra ENIA para un proxecto sobre IA e Algoritmos Verdes que desenvolverá con Inditex

Un grupo de persoal investigador da Universidade da Coruña vén de conseguir unha das 21 cátedras ENIA (Estratexia Nacional en Intelixencia Artificial) que concede o Ministerio para a Transformación Dixital e da Función Pública. Estas axudas, convocadas a través da Secretaría de Estado de Dixitalización e Intelixencia Artificial, financian as cátedras universitarias dedicadas á investigación, divulgación, docencia e innovación sobre IA.
Unha das temáticas susceptíbeis de financiamento no marco desta convocatoria eran os métodos de investigación que buscan reducir o impacto ambiental das aplicacións informáticas, así como o seu uso para atopar solucións sustentábeis, máis coñecidos como “algoritmos verdes”. Esta categoría foi a escollida polo grupo de investigadores da UDC, liderados pola doutora en Informática (e investigadora do CITIC da Universidade da Coruña) Verónica Bolón Canedo, para presentar o seu proxecto en colaboración coa multinacional téxtil Inditex: a Cátedra UDC-Inditex de IA en Algoritmos Verdes.
O proxecto ten como finalidade “promover a investigación, a innovación e a transferencia de coñecemento no ámbito da Intelixencia Artificial e dos algoritmos verdes co fin de contribuír ao desenvolvemento sustentábel e á protección do medio ambiente, sendo algúns dos obxectivos específicos desenvolver programas de formación en IA verde mediante a impartición de cursos e a creación dun programa de doutoramento na materia; promover a investigación e a innovación no ámbito da IA verde mediante a identificación de retos e o fomento da cooperación público-privada; ou facilitar a transferencia e explotación dos resultados da investigación da cátedra mediante a comercialización de servizos e produtos e a creación de spin-offs”.
Segundo Verónica Bolón “a incorporación e colaboración coa multinacional Inditex no marco desta cátedra, permitiranos abordar novos retos aos que se enfronta a industria e, por outra banda, servir como plataforma para probar e escalar os resultados que se xeran no marco da cátedra”. Neste sentido, “Inditex está incorporando a IA, a automatización e o Big Data á súa estratexia empresarial e a súa cadea de subministración como compromiso decisivo”, engade.
O equipo de persoas que forman parte da cátedra está composto por 20 membros, 16 dos cales adscritos ao Centro de Investigación en Tecnoloxías da Información e as Comunicacións da UDC (CITIC). Do colectivo total, 10 son mulleres e 10 homes. Trátase dun grupo multidisciplinar “como é necesario en investigación en algoritmos verdes”, sinala a investigadora principal do proxecto, que require o apoio de grupos de investigación do eido da Intelixencia Artificial e da informática, de problemas medioambientais, e da investigación ética, social e económica.
Nomes Investigadores Cátedra
A impulsora da cátedra, Verónica Bolón, destaca que a súa creación supón a nivel científico “a unión de persoal investigador de IA que xa conta cunha traxectoria ampla de colaboración no marco da actividade do CITIC, con reputados investigadores de novas disciplinas como a Psicoloxía, o Dereito, a Lingüística, a Robótica, o Urbanismo/Construción”. Segundo comenta, “esta combinación de investigadores multidisciplinares axudará sen lugar a dúbida a abordar novas liñas de investigación e dar solución aos problemas e retos identificados no ámbito dos algoritmos verdes".
Malia que a resolución de concesión de cátedras ENIA do Ministerio para a Transformación Dixital e da Función Pública, que se fixo pública este mércores 24 de xaneiro, é aínda provisional; a Universidade da Coruña confirmou que “a creación da Cátedra UDC-Inditex de IA en Algoritmos Verdes será unha realidade unha vez que transcorra o prazo de dez días hábiles que o Ministerio concede para a aceptación e o envío da documentación necesaria para a posta en marcha do proxecto”.
As actuacións desenvolvidas por esta nova cátedra UDC disporán dun financiamento con cargo ao Plan de Recuperación, Transformación e Resiliencia do Ministerio de preto de 900.000 euros, cun prazo de execución que remata o 31 de decembro de 2025. A partir de entón o proxecto deberá continuar desenvolvéndose como mínimo un ano máis co financiamento de Inditex.